Mакедонските производители на вино преку автохтони сорти треба да создадат квалитетно флаширано вино со географско потекло кое ќе биде препознатливо на европскиот пазар. Само така, македонското вино нема да се извезува како наливно и тоа во големи количини и со ниска цена. Ова е препораката од конференцијата „Вино – Европски искуства и македонски можности“ одржана во Кавадарци, на 16-ти јуни 2010 година, во рамките на „Акција за Европа“ а во организација на Фондацијата Институт отворено општество Македонија (ФИИОМ), Македонскиот центар за европско образование (МЦЕО), Младинскиот образовен форум (МОФ) и 11-те центри за локален развој.

Македонија има огромни потенцијали за развој на обновливите извори на енергија, но законските, админстративните и техничките пречки ја кочат можноста за нивно поголемо искористување. До вакви заклучоци дојдоа учесниците на конференцијата „Енергетска ефикасност – европски искуства и македонски перспективи“, одржана на 14-ти јуни, во Кочани, во организација на Фондацијата Институт отворено општество Македонија (ФИООМ) и Македонскиот центар за европско образование, во рамките на програмата „Акција за Европа“.

Акцијата за Европа, во организација на Фондацијата Институт отворено општество Македонија (ФИООМ), Македонскиот центар за европско образование (МЦЕО), Младинскиот образовен форум (МОФ) и 11-те центри за локален развој, на 11-ти јуни, во Стрјумица ја одржаа конференцијата посветена на европските искуства и македонските перспективи во земјоделството. Над сто претставници на бројни невладни и земјоделски организации имаа можност детално да се запознаат со процедурата за добивање средства од ИПАРД програмата, но и да ги слушнат искуствата на претставниците од земји членки на ЕУ во областа на руралниот развој и земјоделството.